41 - Madonne
Dapartuto ghe xè santuari par ogni ocasion,
storie, reliquie inportanti o de sola devosion.
A Vicensa gavemo quei dea Mama Celeste:
a la so ricorensa a fasemo de le gran feste.
Monte Berico, l’è el pì grando o el pì famoso,
ma nol xè l’unico ca gavemo de miracoloso.
Poco distante, scoltème che chi a lo digo,
ghe xè la Madona dei Miracoli de Lonigo.
A Thiene, la Madona dell’Olmo ai capussini,
no la xe dei padovani ma de naltri vicentini.
Santa Libera a Malo, anca in ricordo de ‘a prima guera,
la scanpava dai pericoli e i dolori de parto che ghe gera.
Co xe finia la val de là ghi nè n’altra, quea con Ciampo,
tra la Pieve e la Grota de Lourdes, a no te ghe scampo.
E se ancora no te si pago o no te par vero,
va da la Madona de ‘i infermi a Scaldafero.
Ghin sarìa altre, la Madona del Buso so l’altopian,
quea de l’Acqua a Mussolente vissin a Bassan,
e via cussì fin a Santorso con S. Maria del Suman.
Ma la Madona la xe una sola: dane senpre na man.
Romolo Balasso - Ballincontrà
83 - Veneto mio
La nostra la xe na storia che se respira dapartuto,
ancora inpregnà de quel periodo tristo e bruto:
le do guere, co la fame e tuto el resto de la so miseria,
la ne conta de quanto granda che la xe stà la cativeria.
Caro Veneto mio, a te si propio na tera belissima,
andaxendo su e xo par i ponte dea Serenissima,
dal mare a la montagna, co in mexo la pianura,
te ne ghè forgià tuti quanti co na tenpra dura.
Sete province, fra lore sorele e tute gran bele,
tegnendose par man le xè el to caro de stele,
soto el so cielo te truvi ogni sorta de meraveia,
parchè, anca se diverse, le xe na sola fameia.
Venessia, Rovigo, Verona e Treviso,
le ghe struca de ocio, cussì a l’inproviso,
a Padova, Vicensa e l’alpina Belun,
come el me Veneto no ghe xe nessun.
Gavemo propio de tuto, dal fante a l’alpin,
i ne conosse pal proseco e ogni sorta de vin,
bacalà co a poenta e tante altre robe ancora,
che parfin la gente pì ruspia de ti se i n’amora.
Romolo Balasso - Ballincontrà
82 - Pedemontana mia
Solo da un fià de ani a sta parte,
i ne ga dito come meio ciamarte,
disendo che ti si na bea strissia,
dove la tradission la fa notissia.
Ogni cantòn xe inpregnà de memoria,
magnari, cultura e ogni sorta de storia:
casteli, ville, ciese so ogni paese, orchi e anguane,
belesse che t’incanta s’un fià parché le xe strane.
Quà tuto se veste de magia e de mistero,
a te ve via col sorriso che non te par vero,
te ritornarè pì de na volta, par restare incantà,
sentire la pansa ringrassiare da le tante bontà.
La xe bela tuta la nostra Pedemontana,
tera contadina, tra i monte e la piana,
sensa farghe torto a nessun, sia ciaro,
parchè in Veneto ogni posto ne xe caro!
Romolo Balasso - Ballincontrà
18 - I nostri monte
A ghe xe de i posti che i gà poco o quasi gnente,
quà da nantri, invesse, scumissiando da ponente,
tachemo con la fila de le creste de i monti de Gnago,
fin a Monte de Malo someia che sia stà tirà un spago.
Dopo taca le montagne vere: Obante e Carega,
davanti Bafelan e Corneto i par denti de sega;
a volte, quando che xe ora de dire el rosario,
pì in basso se vede el spuncioto de l’ossario.
Eco che se presenta la storia: el Pasubio col Palon,
quà sì che i gà fato la guera par de bon:
resti e memorie non le xe gnancora sparìe,
basta farse pian pian la strada dele galerìe.
Cossa dire del monte Rione e del Novegno,
vardè che anca lori, par farli, ghe voe inpegno;
la vista poe corere vanti e indrio, de quà e de là,
col Monte Giove che ghe orba l’ocio al Pria Forà.
Lu, a te lo vedi inponente, el par lì a portata de man,
ma le te fa suare anche le creste e le gobe del Suman;
verso Tonesa, ghe xe el Cengio col salto dei granatieri,
te poi ‘ndare anca dal Costo, de traverso par i sentieri.
Treschè, Cesuna ed Asiago i gà i so monte in torno,
Bocheta Paù, Cariola, Sunio, Foraoro e Corno;
xo basso, someia che ghe fassa da scalin le Bregonse,
bele, piene de posti par brasole in gradela co le bronse.
Romolo Balasso - Ballincontrà
36 - Altopian de Asiago
Ma quanto fortunà xela la provincia de Vicensa?
Disemose’o: con l’Altopian de Asiago la se incensa!
De sti posti a ghi né gran puchi al mondo,
penso a l’inverno, par siiare e far fondo.
Ma anca d’istà: a pìe, in bicicleta o col cavalo,
tanta aria bona, svejandose co canta el galo,
e vanti cussì fin sera, su dai, forsa e corajo,
che quà xe el paradiso de on gran formajo.
Se respira anca ‘a storia: alsandose senpre de bonora,
se poe farse le strade de’a guera o quela de’a vacamora:
Asiago, Canove, Cesuna, Treschè fin al Campielo.
Ecco el nostro Altopian: ma quanto xeo belo!
Romolo Balasso - Ballincontrà
65 - Ostarie
Co gò sèn me fermo da la Maria onta,
co la guia el vin la lo fa da sconta,
la dise senpre che no la inbroia,
parchè anca l’acua la xè moia.
Drio a strada da Pacifico, invesse, che xè ‘a Pelosa,
tuto se poe dirghe, ma no che la sia na bea sposa;
scaltra, la fa tuto ela, la par nata ne na ostaria,
la xè anca drita: se uno bestèma la lo para via.
Par bàtare el fante a me trovo da l’osto,
el tavolìn là in fondo el xè el me posto,
mi, Nane, Jio e Menego, col nostro quartìn,
nemo vanti ore e finemo co on rasentìn.
Me nevodo, el pì picinìn, el me vien tore,
nono ‘ndemo, el me dixe col so candore,
a se ciàpemo par man, l’altra so la so spala,
parchè me manca l’equilibrio co son in bala.
Romolo Balasso - Ballincontrà
58 - Fabricati agricoli
On paro de vache, co la binda, in stàla,
me nono mexo sordo e senpre in bàla,
on fiòlo chel non gà voia de far gnente,
na femena chea scàpa co ghe vò da rente.
Mi ca me strassìno co fadiga parchè son pò sòto,
a penso che stà meio el mas-cio ca gò ‘n stalòto,
e anca anca cue’e quatro galine là sol punàro;
ma cossa fala me fiòla vanti e indrìo dal paiàro?
Gnanca el tenpo de tore calcossa in granàro,
che me moiere la sparisse ‘n freta sol fenàro,
li trovo tuti indafarà, lora a ghe digo: propio ti conpare?
Conpare, almanco fermate fin ca te so drìo parlare!
Parò, co se trata de far festa soto ‘a barchessa,
nesùn fa mai de manco de magnare ‘a sopressa,
e sol portego i beve on quartin de quel moro!
Almanco ‘lora par tuti a devento el so tesoro.
Romolo Balasso - Ballincontrà