12 - Inissio
Ne piase mostrare la nostra tradisiòn:
bali, atressi, mestieri, cansòn,
storie e proverbi del tenpo poareto,
dove se parlava soltanto dialeto.
Ga scumissià quei che ghe gera
a far bela la nostra tera;
tuta jente semplice, contadina,
man grosse ma testa fina.
Anca luri, però, i fasea le so moine:
nele sagre i balava le manfrine,
e con discression e tanta creansa,
i se tegnea de ocio nea contravansa.
Da strachi, co no i ghea fasea pì,
i balava taco e punta e lorì-lorì.
Na volta raposà, soto a chi toca,
e xò de marxurca e tanto de polca.
Balava tuti, jovane e veci, tusi e tose,
ma in tondo, scumissiando col valser dee rose;
e par farla meio e anca pì strana,
sete sesti, tarantea e furlana.
I balava anca in meso ai sassi,
prima con do, dopo con quatro e anca sete passi,
e quando qualchedun el fasea dei moti,
bal de la stela o de la guera e parfin i soti.
Davanti a tuti sti veci mestieri,
a ghe in balemo anca de stranieri,
senpre de na volta, no quei de ancò,
tipo circasso, montagnarde e congò.
Desso basta, a ghe molemo de parlare!
a sarè promosi de vedarne balare;
Par intanto, grassie de averne ascoltà,
scumissiemo, eco el grupo de Ballincontrà.
Romolo Balasso - Ballincontrà
10 - Desso ve saludemo
Co’ vien sera la giornata la xe ‘romai finia,
l’inportante averla pasà insieme, in armonia.
Tra salti, bali e canti,
se ghemo divertio tuti quanti.
A semo cussì a Ballincontrà,
contenti de averve mostrà,
bali e robe de un tenpo lontan,
quando tuti i se dava na man.
Xe stà belo a star co voialtri quà,
grassie tante de averne ciamà.
Speremo rivedarse par far altretanto,
ma desso, tuti insieme, femo n’altro bel canto.
(La polenta)
Xe stà propio belo, oncò, a star quà.
Grassie tanto de averne ciamà.
Speremo de rivedarse con tuti voilatri,
ma desso l’applauso ve o femo noialtri.
Romolo Balasso - Ballincontrà
87 - Polca la lingera
Toso, scoltàme, vien chi ca te ‘o digo,
no sta torte su quela, la xè on castigo,
i dixe che la sia una mexa dentro e mexa fora,
una che la gà l’oio senpre caldo so la fassora.
Me sonti spiegà ben puito,
varda de farlo desso suito,
no stà mia spetàre che vegna sera,
la xe, come che se dixe, na lingera.
E pò, stame tento, vidito sti quà,
i xe cuei là, cuei de Balincontrà,
no lo so se i teo dixarà cantando,
ma de sicuro i teo mostrarà balando.
Romolo Balasso - Ballincontrà
86 - La deela sacagnà
Fiòl de on can che male, speta mi co la cato!
La la gà fata grossa, a son drìo vegner mato.
Altro che balare, la gà trato ‘l culo fin desso!
salta de chi o de là par ela xe ‘o stesso!
Co la brinco ghe fasso vedar da ‘ndò chea vien,
a gò on diavolo par caveio e ‘ncora ghe voio ben.
Me formigola tuti i dèì dei pie, restarò desgrassià,
a xè meio ca me calma, sa nò, chii a moro rabià.
A go gran fede che no se gabbia roto gnente,
el dèo grosso l’è a posto, anca quelo da rente;
Maria vergola che pestòn, la parea na piconà,
femena, varda la me deèla la xe tuta sacagnà.
Romolo Balasso - Ballincontrà
75 - Guai a balare
Ancò ghe xe on sole che spaca anca i sassi,
mi a son sol canpo ca misuro parfin i passi,
la camixa moia sbonbà la me fa tribolare,
a se sua a star fermi, te so dire a sapare.
Semo pora gente, sensa nesuna cativeria
co na fameia casa, te buti via ogni miseria,
ma laorando e sgobando la giornata passa lenta,
e non te vedi l'ora de parar xo na feta de poenta.
Pocià xò so la late o so na renga picà via,
l'è on magnare da siori, anca se non se disarìa,
bevendoghe drio on goto de bianco o de moro,
el te para xò tuto, anca s’el gavesse el potoro!
Ma el meio vien dopo, de scondon dal prete,
parché nessun de nantri el va soto le querte,
de rifete o de rafete se trovemo da me comare,
prima se ‘a contemo ma dopo tachemo a balare!
Romolo Balasso - Ballincontrà
6 - I tre gobi
A l’inbrunire, pena che i smorsa i ciari,
me trovo senpre a bevare co i me compari.
Co’ ghi no vudo na carga, son vegnù via,
lassando i altri ‘ncora in ostaria.
Me son dito, xe meio che bata le ore,
ga passarme tuta sta mussa!
Mah...sentito? Ostrega che odore!
No..no..stachì la xe spussa!
Anca sa no go n'cora finìo
xe meio ca via suito fin ca’ posso.
Macchè! Stachì la me vien drio!
Te vorè mia che… mea so fata dosso!
Romolo Balasso - Ballincontrà