146 - L'amor cortese
Sala, mi a ve parlarìa onestamente,
xè testimone el Signore Onipotente;
gò na casa, canpi e tre vache in stala,
se vao in ostaria, no torno mai in bala.
Desso a gò fede che ‘a me capissa,
l’omo ocore ca ‘l se cava sta spissa,
na smania cussì la me xè anca massa,
piarpiasere, cossa me disea ca fassa?
Vegno da so ‘opà domandarghe a man,
lo fasso par de bon sensa essare vilan;
la so dote par mi la gà poca importansa,
de nissui e altro ghinò piena na stansa.
Da l’emossion a son tuto on tremaio,
se ‘a me dixe, tiremolo fora el coraio,
daxemose on baseto come ca convien,
cussì i lo savarà tuti ca se volemo ben.
Romolo Balasso - Ballincontrà
140 - Credense ... animali
Anca stanote se rivà la soetta,
la cantava par metarghe fretta,
o par portare altre disgrassie,
no te vorè mia dirghe grassie.
Vara ca lo go solo sentìo, pararìa,
chel Menego, là fora da l’ostaria,
l’è incapà so do o tri babastrji,
no se gàli incatià so i so cavji!
Go sentìo anca chel Tita sta male,
sol canpo lo gà becà on sginsale,
e par farla conpìa, el so servelo,
l’è stà spuncià da on martinelo.
Mi, invesse, a no so pì cossa fare,
gò el me prà strapien de ciupinare,
vanti strassaro, picale via pal caecio,
e sbeca: strasse, ossi e fero vecio.
No ghe xè tradission sensa na credensa,
medigo che de ela no se poe star sensa,
de sicuro la pì bela la xè là ne la cusina,
senpre inciavà via, pèso de na musina.
Romolo Balasso - Ballincontrà 4.3.2020
127 - El soriso
Par parar via serti malani,
e tegnerse pì beli e sani,
la va dixendo l’esperiensa:
de lu no te poi star sensa!
El xè na bona medissina,
da tore fin da la matina,
da parar xo tuta d’on fià,
tanto la xè a bon marcà.
Scoltando ben te poi sentir
che la dixe: a son mi, l’elisir!
no stà ‘ndare in serca de novità,
varda, pì te gh’in toi, pì ben la fà!
Par chi che no gàvesse capio,
ogni cristian de lu el xé fornio,
col riva a te vidi chel s-ciare el viso,
vardeve nei oci e fasì on bel soriso!
Romlo Balasso - Ballincontrà
94 - Donare = Amare
Succede che la vita rimanga sospesa,
confinata nel limbo di un'eterna attesa,
eppur il tempo inesorabilmente avanza,
tutto diventa flebile, ma non la speranza.
Arriva allora un esercito di rossa bontà,
che allunga il suo braccio con serenità,
la forza interiore pulsa e compare nel viso,
e il flusso inizia a fluire portando un sorriso.
Per loro è un dare senza alcuna pretesa,
son tutte persone con la man sempre tesa,
pronte all'aiuto, ancor più in emergenza,
nessuno di loro fa calcoli di convenienza.
Che dire al cospetto di cotanta generosità,
rendiamo un inchino alla vitale solidarietà,
respirando l'immenso ora ci gonfiamo il cuore,
per dire grazie di esistere a ciascun donatore.
Romolo Balasso - Ballincontrà 26 maggio 2019
50° Associazione DONATORI DI SANGUE di Montecchio Maggiore
Aforismi (famosi):
Anatole France: niente si dà tanto come quando si danno speranze.
Lao Tse: la gentilezza delle parole crea fiducia. La gentilezza di pensieri crea profondità. La gentilezza nel donare crea amore.
Madre Teresa di Calcutta: Non è tanto quello che diamo, ma quanto amore mettiamo nel dare.
39 - Mi ca le vardo
Na mama co la so toseta che la la varda incantà.
Mi ca’ le vardo, a resto lì fermo, come tuti i popà;
a volte la se ‘a strenxeva forte al core,
s-ciocava suito on baso che fasea rumore!
Parlandoghe, la se la dindolava de quà e de là,
la ghe supiava ne ’a pansa con tuto el so fià,
ela, spalancava ‘a boca par sganassar de gusto.
Mi ca’ le vardo, a penso: a me par giusto!
Desso, ela la varda so mama dai ani incurvà,
la la ciapa par man, se poe farlo senpre a ogni età,
el xè on modo par dirghe: mama, a te vojo un gran ben!
Mi ca’ le vardo, a digo, ingropà: eco, anca ‘ncò sto seren!
Romolo Balasso - Ballincontrà
53 - Man dupie
El corpo che da la nassita se ritrova ogni cristiàn,
de duppio el gà i oci, recie, ganbe, pìe, brassi e màn;
vardando meio te truvi sconte anca on paro de culate
e le tete: le poe essar grande fa angurie, moloni o patate.
Par non confondarse, una la xe drita e l’altra sanca,
le fa più o meno lo stesso servissio, guai se le manca!
Drite o storte, curte o lunghe bisogna acontentarse,
se mai ne dovesse capitare, alora ocòre rassegnarse.
I me lo garà dito el parché, ma no gò capìo on cavolo,
el motivo che se dise che la man sanca xe del diavolo,
quela bela che se se segna, invesse la xe la man drita,
a ghi nè de quei che la ga scaltra e i ghe ne a profita!
Ma parchè? A semo quà in pristio sora a sta tera,
cossa ocore farse del male co ogni sorta de guera!
Tuti gàvemo el dirito de vivare ben e meio, anca el pì porocan,
el Signore el ne ga fato tuto dupio parchè se daxemo na man!
Romolo Balasso - Ballincontrà
59 - Dialogo con Dio
A son quà da mi mi solo co na carga de pensieri!
L’è na sorta de tormento che me gà scumissià ieri:
penso sol parcossa ca gavemo tanto da tribolare,
se el mondo ‘l finisse co vièn la to ora de ‘ndare!
Speta: a podarìa domandarghelo a nostro Signore,
a vò dentro in cièsa, là non ghe xè nesun rumore,
e sa semo nantri da soli, de sicuro a se capìmo meio,
sarà al caso che nesun rompa, sanò fasso on degheio!
Ciao Dio, te ricordito de mi? Son so fiòlo del Tita!
spero ca te vaga ben sa te parlo s-ceto là cussita,
daxendote del ti a riesso a svodare ’a cossiensa,
e se no te ‘ndaxesse, serca de portar pasiensa.
Scoltàme, ga senso la vita ca femo sora a sta tera:
dormimo e se alsemo par laorare fin ca non vien sera;
co quei che dixe xò de tuti e dopo i gà coraio ciamarte,
e quei che fà del male e dopo i vien parfin a pregarte?
«Si filiolo, se te vardi ben la vita la xe de suo na meraveia,
pensa a la nassita, ai tusiti, ai amissi, a tuta la to fameia!
Pensa a la natura, ai coluri, a tuta la bona gente che ghe xè,
vardate intorno e davanti, no te vidi mia quanta ca ghi nè!»
Romolo Balasso - Ballincontrà
73 - Amicissia mia
Che meraveia poder provare l’amicissia vera,
na giossa nel mare, parché la ghe voe sincera;
xe belo sentirla co la te liga el core e l’anima intiera,
come na sierpa intorno al colo che la te fa fare bea siera.
Tientela streta forte a ti co te la ghé,
anca se a volte non senpre te ‘o sé;
la poe scondarse de drìo a la sinpatia,
quel bon gusto de stare in compagnia.
Se sente dire che la xè so sorela de l’amore,
senpre pronta a iutarte, a confortate nel dolore,
a far ne la vita on celo na sc-ianta pì seren,
parchè con l'amicissia vera se se voe ben!
Romolo Balasso - Ballincontrà
92 - Nina nana
(ispirata da Nina nana di Galdino Pendin)
On bocia pianxe dal sòno,
suìto so mama lo cuna,
vara ti che granda fortuna,
te pensi par chi no la gà.
Pian pian tuto se chièta,
el core deventa lesièro,
on baxo s-cioca grossièro,
toendo parfin anca el fià.
Nina nana, nina nana,
dormi fin ca non vien dì,
i me oci i xè tuti par ti,
la canta con vose intonà.
Madona bela celeste,
anca ti come mi col tosèto,
te ‘o domando co tuto rispèto,
de darghe senpre on’ocià.
Romolo Balasso - Ballincontrà
3 - Riflession
Na poesia leta ani prima,
scrita tuta in rima,
come che voe la nostra tradision,
in fondo 'a finisce co sta orasion:
El dì che te vivi xe sempre el pì belo
el ieri el xe morto, mistero el doman.
la vita però ga de questo e de quelo:
dai nostri ricordi, vardemo lontan.
Sarà che a mi la me piase;
la xe propio bela sta frase!
co la digo a penso e ripenso
che la dovaria avere sto senso:
«Nea vita se ciapa quel che vien,
queo che conta xe volerse tuti ben,
e par questo, basta un pocheto:
darghe a le robe el giusto rispeto».
Romolo Balasso - Ballincontrà
2 - Chi sonti mi
Con son da solo a penso
che tuto gà un so senso:
par dire, co son davanti al specio
a non so bon de vedarme vecio!
No digo de vedarme putelo,
e gnanca me vedo tosato,
vedo specià quel che de pí belo
i me ga dà quando ca son nato.
E alora, me domando: ma chi sonti mi?
Eco, xe co te vedo ti ... ma anca ti e ti,
che a capire me basta un gnente:
tuti insieme femo la nostra gente!
Romolo Balasso - Ballincontrà
1 - La vita
La vita, lo savemo tuti, la ga alti e la ga bassi.
La xe come na strada che speta i nostri passi.
Te poi andar vanti drito o anca in tondo,
parchè xè cussì che va vanti el mondo.
Quando che no te te senti sicuro,
va vanti pian, e de rasente al muro.
Lì te camini, te curri e te sbrissi,
perdendo a’ pasiensa e i amissi.
Cussì ne la mente el pensiero te vien:
nel la vita bisogna volerse senpre ben,
ciàparse, co se poe, tuti par na man,
parché alora no fa pì paura el doman.
Romolo Balasso - Ballincontrà